空姐變教煮 專攻公司PARTY客
香港居住空間愈來愈細，但不少人依然愛煮飯仔，不僅比出外吃飯平，更因可以維繫浪漫溫馨，所以很多OL都想做到出得office入得廚房，奈何由朝做到晚，連搵書睇video去學的時間也匱乏，還是上烹飪課最具效率！要出奇制勝，除了廚藝要紮實外，Cooking Fever創辦人兼導師Celia表示更最重要的是化繁為簡，讓學員在短短3小時的課程內，有信心在屋企製作出一模一樣的菜式。此外，Celia更以比賽形式來進行team building活動，大受公司客歡迎。
採訪當日，Celia與私人包場的客人，一起製作不少菜式，完成後客人更邀Celia一起進餐暢飲，打成一片。
不少坊間的烹飪課程純粹看導師示範，但Celia的課程很着重實習，讓學員落手落腳才會學得好。「課程菜式約3個月轉一次，另設有應節課程，好似中秋節會舉辦月餅班，啱啱過咗嘅白色情人節亦有開班，教整心心相印黑松露磨菇批等特別菜式。
不少公司透過Cooking Fever的烹飪課程，協助同事建立團隊精神。圖為IBM team building event後連製成品的大合照。
說到比較受歡迎的課程，是坊間cooking studio比較少見的西班牙菜烹飪班。Celia說：「課程通常約3小時，我會教整西班牙小食拼盤(Tapas)、西班牙海鮮飯等，有唔少OL嚟上堂，keep住有人報讀。」Celia試過教學員造牛油果沙律，有位學員不知牛油果有核，竟然花盡力氣試圖將牛油果劈開，最後連刀也劈壞了。「所以連一啲可能被忽略嘅細節，都會盡量講畀學員知。」
Celia表示學烹飪，勤力和創新都好重要。「坊間有好多門路去學煮嘢食，睇片及睇書都得，但我嘅宗旨係化繁為簡，講解要清晰簡潔，希望學員返到屋企都能夠造出一樣的菜式。以西班牙海鮮飯為例，好多人都以為好難煮，坊間嘅食譜又會寫到好繁複，其實海鮮飯嘅造法好似中式煲仔飯，我教導學員時會用煲仔飯做例子，畀學員有聯想，就會更快學到。」
不少人也會包場作私人派對，一邊煮一邊食一邊聊天，一同歡渡良宵。
有壓力變創業
80後的Celia，於香港大學修讀數學系，畢業後曾任空姐，後來轉做地產。「家人唔鍾意我周圍飛，就決定轉行。當時我主要負責寫字樓租務，朝9晚6，工作都算穩定。」從事地產工作6年後，覺得壓力大，她見自己已儲了一筆錢，便希望創業做自己喜愛的事，開設cooking studio。
Cooking Fever佔約1,800平方呎，分廚區、餐區及設有大梳化的客廳。
「因為爹哋媽咪都要返工，所以由中學開始，我就要煮飯畀家人食，亦令我愛上烹飪。」Celia從母親身上學習到一些基本中餐的煮食技巧，不過她較愛煮西餐，所以不時上網找食譜，慢慢無師自通，煮出一手好菜式。
除了Celia（右）邊煮邊教外，學員也會一同「開爐」實習。
香港家庭的廚房普遍很細小，要招呼朋友有點不便，故Celia認為即使坊間已有不少cooking studio存在，但仍有不少發展的潛力。Celia表示除了教班和搞私人對派外，也要迎合香港的公司以烹煮作為team building培訓的需求。「以前做空姐時，我都有喺泰國、新加坡嘅cooking studio與同事煮嘢食，作為team building培訓。香港嘅cooking studio一般面積較小，所以我會揀一個面積較大嘅地方，以容納更多人做team building。」
Celia鎖定觀塘作為創業的起點，「東九龍愈嚟愈多寫字樓落成，加上交通四通八達，去港九新界都好方便。」看了不少觀塘的工廈單位後，最終Celia選了一個在apm附近的工廈單位，這裏前身是跳舞教室。「除咗多窗口比較光猛外，喺觀塘港鐵站行過嚟亦只需5分鐘，而呢度嘅大堂及環境都比附近嘅工廈企理。」
將大大塊豬腩肉醃好，便放入焗爐焗約2小時，一道西班牙燒豬腩肉便熱辣出爐。
在裝修方面，Celia首先訂造一張大的工作枱，放在當眼位置，讓客人及學員可以看到烹飪示範；另外，亦安裝了大型電焗爐及電磁爐。「我想畀學員有屋企嘅感覺，所以除咗工作枱及餐枱外，我仲放咗一張大梳化，畀佢哋有享受嘅空間。」
為迎接私人派對的客人，Celia特製鵝肝多士。
用了3個月時間裝修，Cooking Fever於15年4月開業，Celia主力在facebook及instagram宣傳，不過她認為口碑更重要。「客人喺呢度真係學到嘢，就會介紹朋友同事過嚟，所以口碑比任何宣傳更重要。」
由客人製作的籠仔荷葉飯，在Celia的指導下，一樣出色。
比賽形式吸公司客
Celia表示初時公司客因看到Cooking Fever網頁的team building活動介紹，而前來參加活動，「公司嘅team building活動通常會將同事分組，每組5至6人，製作頭盤、主菜及甜品，我會教導頭盤及甜品，主菜則用比賽形式進行，由組員互相合作，在菜式上發揮創意，從而建立團隊精神。」
比賽為準備當晚的私人包場，Celia下午便走約15分鐘步程，前往瑞和街街市揀蟹。
因比賽元素夠吸引，建立了口碑，故累積了不少企業客戶，當中包括不少著名企業，包括CSL、匯豐、UBS、Ralph Lauren及Dyson等。「我會將有合作過嘅企業logo放喺網頁上，令其他企業更有信心同我哋合作。」Celia說曾經與一些健康飲品公司合作，會要求她以他們的產品作為主題，設計teambuilding活動的菜式。
不少電視節目都曾借用過Cooking Fever作拍攝場地，包括Viu TV的《出得廳堂》及TVB的《學是學非》（見圖）等，也是收入來源之一。
開派對容納80人
現時team building佔生意額約6成多，兩成是烹飪班，一成半是包場；當中學員有7成是OL。若是公開收生的烹飪班，每班約收8至10位學員，每位收費約$550至$580等；私人包堂約可教導8至二十多位學員，每次3小時，每位收費$580起；team building烹飪課程約有十多至三十多名客人，每次3至4小時，每位收費則由$550起，費用已包括材料。Celia說：「最多試過有公司嚟開聖誕派對，容納到80人。」
客人Veronica表示：「呢度有好多空間去準備食材煮嘢食，環境亦好warm，有屋企嘅感覺。」
為了令課程更多元化，Celia會與其他廚師合作開班，「我會邀請日本師傅嚟搞日本料理班，教導點樣手打蝦丸、梅酒浸番茄等日式菜式。」今年Celia計劃推出一本烹飪書，希望增加知名度，招徠更多客人。
客人Sandy表示：「Celia好細心，會講一啲我哋未必知嘅烹飪技巧，佢會有耐心去教每一個step，我返屋企跟住做就煮到。」
參考來源：青雲路