由小店做起　25年擁24分店 海皇粥店成功靠衞生

香港近年流行撐小店，日韓飲食風亦蠶食傳統餐飲市場，但憑一條鮮脆油炸鬼賣出名堂的海皇粥店執董蕭楚基卻不以為然，笑言「食粥係傳統，唔係潮流」，以往見盡「葡撻、沙冰」等潮流敗退，25年來最講究店舖衞生及產品品質，加上肯適應市場氣候推出新產品，近月密密逆市擴充，至今已有24間分店。
記者：方楚茵

街邊小店一條油炸鬼只賣6、7蚊，海皇一條要賣近10蚊，卻依舊客似雲來。蕭楚基帶點自豪的說「（傳統粥舖）請個師傅返嚟，炸好擺喺到，賣到就賣，賣唔到就算」，但他卻認為新鮮最緊要，揼本請師傅「分兩市炸，確保全日都有新鮮油炸鬼食」，招牌產品由此而來。

舊式粥舖「奇景」啟發

要講海皇粥店歷史，得由1992年蕭楚基還是「屋邨仔」時的奮鬥故事說起。蕭楚基回憶年輕時「喺屋邨長大，自細就成日發白日夢想做生意，唔會打工，又睇書點賺第一桶金」，曾經除了一份正職，更「秘撈」兩份兼職，「朝7晚11」日做16個鐘。
足足花上三年時間儲到第一筆共廿、三十萬元創業基金，卻非一帆風順。起初他由做物業買賣開始，但好快發現競爭太大，一不留神已畀搶單。他本身係潮州人，鍾意食艇仔粥、炸兩，機緣巧合認識家族經營傳統粥店的拍檔蔡汪浩，看準各種舊式粥舖衞生「奇景」，好似「搓油炸鬼，啲師傅咬住條煙仔，煙灰又成吋，幾乎跌落啲粉到」、「腸粉師傅着件文化衫（T恤）白色變黑色，頭髮又唔梳，指甲又黑喺度整油炸鬼」，衞生惡劣令食客卻步這一點，決心創辦現代化的海皇。

無懼近年日韓飲食風

蕭楚基回憶，由1992年創辦第一間紅磡分店起已要求「姐姐一定要擦口紅、要穿棗紅制服、門店裝潢要漂亮啲」，「海皇粥店」四隻招牌大字以金色銅製，今日看來老土，卻是當年流行。
25年歲月走來，店舖均行五常法（常組織、常整頓、常清潔、常規範、常自律）管理，擁ISO等認證，食客難在海皇見到「油立立」玻璃，員工全戴口罩，早設中央廚房。
近年韓、日風潮攻陷年輕食客、流行幫襯小店等，他認為影響不大，因海皇食客廣泛，強調「我哋都係小店出身，只係做做吓25年自然大咗」，無懼小店夾擊。