車站便當 攻港鐵站商場

「今日lunch食乜好？」差不多是打工仔每日煩惱的問題吧？ Canteen吃到厭，餐廳要等位又多人，便當似乎是不錯的選擇，加熱方便，有些更可以冷吃，相信是不少繁忙人士的首選。今年35歲的Ken，於兩個月前在調景嶺站上蓋商場開設了Bentoya（即便當屋意思），以車站便當為主題，售賣日式便當、手卷及飯糰，他設有自家的食品工場，便當每日新鮮製作，然後出車直達店中。開業首兩個月，反應甚好，當中以蒲燒鰻魚及和風牛肉便當最受歡迎！

採訪當日，記者來到位於調景嶺港鐵站上蓋都會駅商場的Bentoya，店中有售賣咖喱吉列豬排便當、漢堡意粉便當、豚肉生姜燒便當及和風牛肉便當等，還有很多小食，如新鮮出爐的大阪燒、薯仔沙律及溏心蛋等，琳瑯滿目，令人食指大動，有如置身日本車站，買完可以上車吃的感覺。老闆Ken表示：「便當有分凍食及熱食，我哋仲可以幫客人加熱，拎返公司或者即刻食都得。」

12年，Ken開設了自家的食品工場，每日新鮮製作便當，並送抵店面，「我哋做嘅便當全部唔加防腐劑，每日送去店鋪3次，賣完就冇。」Ken指於港鐵站的商場開店有一定的優勢，「好似日本嘅車站便當店鋪，唔同時段都有人流，滿足到唔同類型嘅客人。」

選擇在都會駅商場開業，全因這裏有不同類型的客人。Ken說：「現時朝早以上班族為主，夜晚就到放工嘅人士嚟購買。通常午市最多人，除咗街坊及其他商戶外，附近仲有中、小學及知專設計學院，會有好多學生嚟幫襯。」

現時Bentoya日賣約200個便當，當中以和風牛肉便當及飯糰最受歡迎，飯糰和便當的售價約$13至$68不等。Ken說：「開張當日係10號風球，全商場得我哋一間食店開門，好多人嚟買便當，出現人龍。之後幾次打風，我哋嘅生意都多平時一倍！」

99年中學畢業後，Ken做過零售業及採購代理的工作，直至05年，因為爸爸退休，他便接手家族生意，經營飲食集團，旗下包括吉列牛專門店琥酌、居酒屋八海山、居食屋一休、六丸及七本日本料理等。「屋企人以前做廚房工程，代理外國牌子嘅廚房設備，喺00年開始發展埋日本料理餐廳，以居酒屋類型為主。我接手後，主要負責管理生產及控制成本等back office嘅工作。」

一直沒有刻意找尋新方向的Ken，在12年卻遇到了需要改變的時機，因當年香港整體經濟不景氣，令餐廳收入減少，加上各方面的成本都有所提升，Ken便想到設立自家食品工場來解決問題。「如果自己做埋餐廳嘅貨源供應，供貨及運輸上會慳好多，仲可以批發畀其他餐廳。」他更親自到日本各種食品公司洽談代理，現時已成功合作的品牌約有13個，批發的客戶多達300個。

零售慳人手
有自家食品工場的便利，令Ken嘗試發展零售食店，節省了在店內烹調的成本，「今年2月有開Bentoya嘅構思，零售鋪相比餐廳，減省到店面大量嘅人手，我哋做埋食材供應，產品嘅價錢一定比坊間平2至3成。我希望客人用大眾化嘅價錢，食到中高檔級嘅海鮮食材，好似燒鰈魚、筑前煮、鰻魚及蟹肉等，平時坊間要食質素好嘅海鮮可能$150起，我哋做到$40至$50畀大家食到。」

Ken表示初初不懂預貨量，試過賣剩很多，又試過很早沽清，「鯖魚便當試過好好賣，又試過一個都賣唔出，搞到最後要丟晒；亦試過成間鋪嘅便當好早賣完，8點就收鋪。經過呢兩個月嘅統計數字，預備嘅分量慢慢就開始準確。」