練刀功學用鏟 開鐵板燒店
料理動畫《食戟之靈》來到了第3季，當看到主角製作各國料理時，都禁不住想一同參與，學習製作美味的食物。在現實中，若對日本料理有興趣，可報讀坊間的短期課程，以增加對行業認識及增進烹調技巧。今年28歲的Marshall，曾修讀有關鐵板燒烹飪證書的課程，學習製作鐵板燒的技巧，包括刀功、用鏟技巧及處理不同食材的方法等。修畢課程後，他開設了鐵板燒快餐店，可以真正跟客人說聲：「お上がりよ！（ 請慢用）」
15年，Marshall於深水埗開設的板上，是一間以鐵板燒為主題的快餐店。Marshall曾到美國修讀汽車設計，回港後便替家人打理菜檔生意，「自己一直都想創業，觀察到日本料理喺香港好受歡迎，見當中鐵板燒店比較易上手，就報讀國際廚藝學院新開辦嘅鐵板燒烹飪證書課程，先學用鏟嘅技巧及製作鐵板燒嘅流程，之後就正式創業。」
鐵板燒猶如表演
Marshall表示製作鐵板燒猶如一場表演，因要在客人面前製作，故準備工夫要做足，「導師會教我哋預先切好晒啲材料，唔好喺客人面前先嚟切，製作亦會流暢啲。課堂上，我仲學到處理唔同食材嘅技巧及相應刀功，例如切茄子要先切花，入面先會容易熟；用鐵板燒專用嘅叉喺鐵板上剝蝦殼；處理牛扒時，要入面熟，外面又唔老，可以用sake mushi嘅方法，即喺肉度落酒後，即刻用個蓋罩住，牛扒入面就會快啲熟。」
做洗板動作
有20年從事鐵板燒料理經驗的導師Kumer表示，課堂上會先讓學員了解食譜，再作示範，然後每位學員都有製作的機會，「我會教學員整雞肉炒飯、炒拉麵、蛋包飯及牛扒等料理，仲有教製作過程要注意嘅事項，包括保持鐵板喺110度至120度，不時要做洗板動作，保持鐵板嘅清潔，客人先會食得安心。」
資料來源：青雲路