前酒店西廚　以精緻食物賣相吸客

觀塘區工商業大廈林立，有大量的上班人士尋食，故吸引不少人來開設食肆。西廚出身的 Billy看中當中的商機，在 10年與拍檔開設西式輕小食店 Bubble Tree，以新鮮食材、酒店的食物質素及賣相作賣點，受到不少 OL歡迎。

Bubble Tree是由 Billy、阿龍及阿鴻一同經營， 34歲的 Billy已有十多年入廚經驗。 98年中五畢業後， Billy已向飲食業方面發展，「我去咗讀餐飲管理文憑，之後仲參加咗一個飲食集團嘅計劃，去西安學咗年半中廚，之後返嚟香港去一間法國餐廳做學徒。喺香港做西廚會吃香啲，之後去過唔同酒店嘅西廚部工作。」

直至 10年，希望創業的 Billy，找來拍檔阿龍創立 Bubble Tree，以外賣西式輕食形式經營，主打觀塘區內的上班人士。「做過幾間酒店西廚，想襯後生試吓出去創業。見觀塘區未有太多西式餐飲，又多上班一族，餐飲應該有得做，搵咗都係做酒店嘅阿龍一齊，喺東廣場租咗一個 3百呎嘅鋪，主打三文治，再加幾款意粉。」

Billy表示想以新鮮食材，及可媲美酒店的質素來吸引客人，「蔬菜由本地農場供應，每日新鮮運到鋪頭；我哋搵番酒店嘅供應商拎肉類及其他食材，之前打工同佢哋有交情，就算入得少量，都肯供貨畀我哋。食材唔會放多過 2日，雖然成本高咗，但想保持食物質素；而喺擺盤及味道上我哋都跟番酒店嘅要求，希望藉此吸引到客人。」

雖然有酒店水準，但 Billy表示開業頭半年餐廳的生意都不好，「開張時，商場未裝修晒，得幾間鋪開咗，人流好少，有去落雜誌廣告、喺街派傳單及與團購網站合作，但頭半年都係蝕錢。之後商場裝修好，開始做宣傳，而我哋餐牌都有所調整，發現客人都係鍾意意粉類多啲，意粉由 4款加到 7款。我哋亦喺店外擺設枱凳，提供堂食服務，慢慢生意漸有起色。」

提供到會服務

除了經營餐廳外， Billy說 Bubble Tree亦有提供到會服務，「開咗大約 3、 4個月，有客人問我哋會唔會有食物到會，我哋覺得多一個業務，即係多一個收入來源。之後喺客人介紹下，我哋多咗同公司及商場合作，好似 K-11搞 event都有搵我哋到會食物。