屋邨茶餐廳　自設工場賣即燒燒味

傳統行業往往要面對承傳的問題，當中飲食業亦難有新血加入。燒味二代 Leo希望把父業發展得更多元化，在 11年創立榮康燒味餐廳，主打燒味飯，茶餐廳內設有燒味工場，可自成生產鏈，將即燒燒味變為餐廳主打美食，做到品質控制上有保證，希望將燒味生意發展得更加好。

因爸爸開燒臘店，在讀書時， 80後的 Leo已幫手針豬、斬豬及企檔等，每個工序都接觸過，「 00年中七畢業後，我想出去闖闖，做過時裝批發及零售業。直到 09年，爸爸有個朋友喺深水埗開茶餐廳，想搵人頂手間鋪，我覺得工字不出頭，不如試吓自己搞生意，就頂手嚟做。」

老闆初體驗

80後的 Leo對經營餐廳沒有經驗，很多地方也是慢慢摸索出來，「最初向爸爸嘅朋友取經，請教佢訂貨、定價、經營時間等，自己亦去唔同崗位幫手，樓面、送外賣、清潔及收銀等都做過，了解一間茶餐廳係點運作，會知道咩時段多人、人手點樣安排，喺經營上都應付得嚟。」

慢慢累積到飲食業經驗， Leo想把家中生意加入其中， 11年決定開設榮康燒味餐廳，「想發展番燒味呢行，始終屋企做開，會有相關經驗及入貨都易啲。當時住緊青衣長康邨，見附近個冬菇亭冇人租，我同屋企人商量後，覺得個地點近自己住嘅地方，鋪頭面積約 6千呎，夠大開到燒味工場，可以即燒即賣燒味，最後決定將深水埗間鋪頂畀人，另外喺邨內開茶餐廳，提供自家燒味。」

Sell人情味

榮康燒味餐廳主做街坊生意， Leo表示維持生意要靠人情味及食物質素，「多數都係屋邨內嘅住戶幫襯，見多幾次面有時會傾幾句偈，下次嚟會打招呼，我仲記住佢哋經常會點乜嘢餐，班客同你熟絡咗，自然會多啲嚟幫襯。食物上自己會睇住，至少燒味一定有保證。」
另外，要經營好飲食業，員工十分重要， Leo說管理上要建立良好關係，懂得互相體諒，「我哋係服務業，盡量以客人為先，客人話碟飯及杯飲品有問題，員工都會換畀佢。但員工係提供服務，唔係服侍客人，試過有客人提出好多無理嘅要求，呢樣嗰樣，阻到員工工作，呢個時候我絕對會企喺員工嗰邊，會客氣請客人離開。你對班員工好，佢哋會感受到，會易啲留到人。」

旺角鋪難維皮

16年， Leo希望生意有所突破，與友人合資開設榮康乳豬專門店，進駐旺角新世紀廣場，「廣場個 food court想搵新餐廳，我哋要寫 proposal，仲要面試 present自家特點，最後成功咗。我哋賣點係現場即燒乳豬，客人反應都唔錯，不過間鋪每月租金加燈油火蠟雜費要成 20萬，加上我哋用嘅食材都係酒店水準，成本好高，但定價又唔可以太高，唔係個個月都維到皮。」

堅持到今年 3月，旺角店收支還是難以收支平衡， Leo決定結束旺角店，再另謀出路發展，「香港嘅租金貴，對擴充業務有好大嘅制肘，嚟緊想嘗試發展網上店，推出網上訂乳豬及燒味套餐，方便公司用嚟做新鋪開張，慶祝周年紀念等活動，想將燒味呢個傅統行業做得更好。」

開業成本
租金︰$400,000（ 3按 1上）
裝修及器材︰$1,200,000
入貨︰$90,000
總投資︰$1,690,000

每月收支
－租金︰$100,000
－人工︰$190,000（ 12名全職+4名兼職+1名老闆）
－入貨︰$85,000
＋營業額︰$420,000
＝盈利︰$45,000